गर्नुपर्ने कुरा:

• अरबेली समाजका गोपनीयता र महिलाहरूको सुरक्षित भूमिकालाई सम्मान गर्ने
• महिलाहरू कोठाभित्र प्रवेश गर्दा पुरुषहरू बाहिरै उभिने
• महिला तथा पुरूषको बसोबासका लागि निर्धारित भिन्न भिन्न ठाउँबारे विचार गर्ने
• कुनै पनि महिलालाई पुरुषसँगै भएको कोठामा खाना खाने आशाय वा घुलमिल हुनु हुँदैन

गर्नु नहुने कुरा:

• कुनै पनि अरबेली महिलासँग हात नमिलाउने ( ती महिलाले पहिले हात मिलाउन खोजेका अवस्थामा वा तपाईं पनि महिला नै हुनुहुन्छ भने बाहेक)। गोप्य स्थानमा महिलाहरूलाई जिस्क्याउने, यौन-प्रस्ताव गर्ने, अङ्कमाल गर्ने वा कुराकानी गर्ने नगर्नुहोस्। यसो गर्नाले उनीहरूको सुरक्षामा खतरा पुग्न सक्छ।
• तपाईंको कामसँग असम्बन्धित कुनै पनि सार्वजनिक महिला कर्मचारीसँग कुराकानी नगर्नुहोस्।
• आफूलाई औपचारिक रूपमा चिनाउनुभन्दा पहिले कुनै पनि महिलासँग कुराकानी गर्ने प्रयास नगर्नुहोस्।
• कुनै पनि महिलालाई एकोहोरो नहेर्नुहोस् वा आँखा नजुधाउनुहोस्।
• कुनै पनि अरबेली पुरुषसँग उनकी श्रीमती वा परिवारका महिला सदस्यबारे प्रश्न नगर्नुहोस्।

गर्नु पर्ने:

• मानिसहरूसँग भेट हुँदा हात मिलाउनुहोस्।
• कसैलाई अभिवादन गर्दा उभिनुहोस्।
• कफी खाइ सकेपछि कपलाई दायाँबायाँ हल्लाउनुहोस् । यसो गर्नाले तपाईं थप कफी लिन चाहनुहुन्न भन्ने बुझिन्छ। यति थप कफी खाने इच्छा छ भने कफी थप्न आउने व्यक्तिलाई आफ्नो कप देखाउनुहोस्।
• तपाईंका अरबेली मित्रले कफी खान प्रस्ताव गर्दा स्वीकार गर्नुहोस् किनभने कफी सेवन अरबेली आतिथ्यको महत्त्वपूर्ण सूचक हुनुका साथै पारस्परिक सद्भावको विस्तारित र स्वीकृत सङ्केत हो।
• १० ले भाग जाने अङ्कका आधारमा ट्याक्सी भाडा तिर्नुहोस्।
• मूल्य निश्चित भएका पसलहरूमा बाहेक अन्यत्र सामान किन्दा व्यापारीसँग मोलतोल गर्नुहोस्
• परम्पराअनुसारकै पहिरन लगाउनुहोस्
• अरबेलीहरू कसैसँग कुराकानी गर्दा निश्चित दूरीमा रहन चाहन्छन् भन्ने कुराको हेक्का राख्नुहोस्।

• सार्वजनिक ठाउँमा प्रार्थना गर्दै गरेका मुस्लिम धर्मावलम्बीका अगाडि जाने वा वाधा गर्ने नगर्नुहोस्।
• उत्तेजना जगाउने खालका लुगा नलगाउनुहोस्; कुवेतमा महिला पुरुष दुवैले विरलै मात्र हाफ पेन्ट लगाउने गर्दछन् ।
• कुनै परिचितले तपाईंलाई अभिवादन गर्ने क्रममा गालामा म्वाइ खाए भने नआत्तिनुहोस् किनभने दुवै गालामा म्वाइ खाएर न्यानो अभिवादन गर्ने प्रचलन अरबेली समाजमा प्रचलित छ।
• आफ्ना अरबेली आतिथेय (आश्रयदाता) ले खाना थप्न आग्रह गर्दा अप्ठ्यारो नमान्नुहोस् किनभने अरब परम्परामा बढी खाना खान आग्रह गरिनुलाई सत्कार, उदारता र शुभेच्छाको द्योतक मानिन्छ।
• ट्याक्सी चालकलाई टिप्स दिनै पर्छ भन्ने होइन तर यसो गर्नुलाई राम्रो मान्ने प्रचलन छ।

गर्नु पर्ने:

• युएइमा प्रवेश गर्नुभन्दा अघि तपाईंसँग वैध राहदानी र भिसा रहेको सुनिश्चित गर्नुहोस्। राहदानी, भिसा लगायत अन्य महत्त्वपूर्ण कागजातहरूका प्रतिलिपिहरू सक्कली कागजात भन्दा भिन्नै स्थानमा सुरक्षित गरी राख्नु आवश्यक हुन्छ।
• तपाईंले गर्ने यात्राबारेको पथ प्रदर्शन पुस्तिकाको एक प्रति घरमा वा साथीभाइहरूकहाँ छोडिराख्नुहोस्। यसो गर्नुभयो भने अप्ठ्यारो अवस्था आइ पर्दा सम्पर्क गर्न सजिलो हुन्छ। युएइको कम्तीमा एउटा आपत्कालीन फोन नम्बर कण्ठ पारी राख्नुहोस्।
• दुबहीका आधिकारिक सटही केन्द्रबाट मात्रै पैसा सहटी गर्नुहोस् किनभने युएइमा विदेशी पैसाको सटहीमा प्रतिबन्ध नभएकाले संसारका प्रमुख मुद्राहरूको सटही जताततै गर्न सकिन्छ।
• युएइमा जतासुकै सहज रूपमा उपलब्ध हुने बोतलको पानी मात्र पिउनुहोस् । धाराको पानी लवणरहित गराइएको हुँदा पिउन योग्य हुन्छ तैपनि पिउनका लागि बोतलकै पानी राम्रो मानिन्छ।
• फोटो खिच्ने काम (खासगरी मानिसहरूको) संवेदनशील विषय हुन सक्छ। फोटो खिच्नु पर्दा अनुमति लिनु पर्छ भने हवाइ मैदान, सैनिक इलाका तथा सरकारी भवनहरूको फोटो लिनु हुँदैन।
• युएइको स्थानीय संस्कृति र परम्परालाई सम्मान गर्नुहोस्।
• घामबाट आँखा जोगाउनका लागि घाम-चस्मा र छाला जोगाउनका लागि क्रिम लगाउनुहोस् किनभने ग्रीष्म ऋतु (जुलाई-अगस्त) मा यस ठाउँमा कडा घाम लाग्ने हुँदा गर्मी सहन गर्न गार्होऋ हुन्छ।
• उपयुक्त पहिरन लगाउनुहोस्। समुद्री किनारमा वा पोखरी परिसरमा पौडीका लागि उपयुक्त हुने खालका पहिरन लगाउन सकिन्छ तर सार्वजनिक स्थानमा सामान्य र सम्मानजनक पहिरन उपयुक्त हुन्छ । सामान्य नियम अनुसार महिलाहरूले ढाड तथा घुँडा छोप्नु पर्दछ । रमदानका अवसरमा यस्तो पहिरनलाई विशेष महत्त्व दिइन्छ।
• कुनै औषधी सेवन गरिरहनु भएको छ भने यो औषधी युएइमा उपलब्ध हुन्छ कि हुँदैन भन्ने कुरामा जानु अघि नै विचार पुर्या उनुहोस् । codeine लगायतका कतिपय औषधीहरू युएइमा प्रतिबन्धित भएकाले डाक्टरी सल्लाहमा पनि यस्ता औषधीहरू ल्याउन पाइँदैन। कुनै औषधी नियमित सेवन गर्नु पर्ने भएमा केही महिनालाई पुग्ने गरी लिएर जानुहोस् । यस्तो औषधी ल्याउनु पर्दा डाक्टरको पूर्जी पनि साथमा राख्नुहोस् किनभने भन्सारमा देखाउनुपर्ने हुन सक्छ।

गर्नु नहुने:

• गैर मुस्लिमहरूले अनुमति पत्र प्राप्त रेस्टुरेन्ट, भट्टी, क्लब, निजी स्थान वा घरमा रक्सीजन्य पदार्थहरूको सेवन गर्ने अनुमति पाउँछन्।
• लागू पदार्थहरू पूर्णत: प्रतिबन्धित छन्। युएइमा लागू पदार्थको कारोबार गर्नु अत्यन्तै खतरापूर्ण हुन्छ। मृत्युदण्ड समेत हुन सक्छ।
• वैवाहिक सम्बन्ध विनाको यौन सम्बन्धलाई गैरकानुनी मानिन्छ। युएइमा विवाह नभएका युवायुवतीलाई सँगै बस्न दिइँदैन। होटलमा एउटै कोठामा बस्न पनि अनुमति दिइँदैन।
• मादक पदार्थ सेवन गरी गाडी चलाउने कार्यप्रति युएइमा शून्य-सहनशीलताको नीति अवलम्बन गरिएको हुँदा यस्तो अवस्थामा सार्वजनिक गाडीको प्रयोग गर्नुहोस्।
• युएइमा चेक बाउन्स गर्नु गैरकानुनी मानिन्छ।
• आफ्नो घरमा वा अनुमति प्राप्त क्लबहरूमा मात्र नाचगान गर्न पाइन्छ।
• यौनजन्य हिंसा, सार्वजनिक स्थानमा महिलाहरूसँग कुराकानी गर्नु र अनुमति बेगर महिलाहरूको फोटो खिच्नुलाई गम्भीर रूपमा लिइने हुँदा कडा सजाय हुन सक्छ।
• विवाहित पुरुष महिलाहरूले एक अर्काको हात समाएर हिँड्न पाउँछन् तर सार्वजनिक स्थानमा म्वाइ खाने र अङ्कमाल गर्ने कुरालाई सार्वजनिक शिष्टताको उल्लङ्घन गरिएको मानिन्छ।
• सरकारी स्थान, कार्यालय तथा व्यापारिक केन्द्रहरूमा धूम्रपान वर्जित छ।
• काम गर्ने भिसा बिना कुनै पनि काम गर्नु गैरकानुनी हुन्छ। काम गर्ने भिसा नलिइकन कुनै पनि किसिमको तलबी काम गर्ने अनुमति पाइँदैन।

रमदानको पवित्र समयमा:

• घाम अस्ताउनुभन्दा अघि कुनै पनि सार्वजनिक ठाउँमा खानु, पिउनु वा धुम्रपान गर्नु हुँदैन। आफ्नै गाडीभित्र बसेर पनि केही खानु हुँदैन।
• सार्वजनिक रूपमा प्रेम प्रदर्शन गर्नु हुँदैन।
• अङ्ग प्रदर्शन हुने खालका लुगा लगाउनु हुँदैन।
• प्रार्थनाका समयमा चर्को आवाजमा टेलिभिजन वा सङ्गीत बजाउनु राम्रो मानिन्न।

सांस्कृतिक दृष्टिले गर्नु हुने र गर्नु नहुने
कतारमा मादक पदार्थ सेवन अत्यन्तै संवेदनशील मानिन्छ । त्यसकारण मादक पदार्थ सेवन गर्ने अनुमति पाएका व्यक्तिहरूले सधैं सावधानी अपनाउनु पर्दछ। निजी घरहरूमा र बिक्री गर्ने अनुमति लिएका स्थानहरूमा समेत सावधानी पूर्वक प्रयोग गर्नुपर्ने हुन्छ। व्यक्तिगत रूपले मादक पदार्थको बिक्री तथा आदान प्रदान वर्जित भएकाले यस्तो कर्म गर्ने व्यक्तिले गम्भीर सजाय पाउन सक्दछ। मादक पदार्थ खरिद गरी घर ल्याउनुपर्दा निजी गाडीको मात्र प्रयोग गर्न पाइन्छ।
कतारमा ट्राफिक नियमको कडाइका साथ पालना गर्नुपर्छ। मादक पदार्थ सेवन गरेर गाडी चलाउनु कतारको कानुन विपरीत कार्य हो। मादक पदार्थ सेवन गरेर गाडी चलाउने व्यक्ति यातायात दुर्घटनाको कारक मानिन्छ। कतारमा गाडी चलाउने तरिका विदेशीहरूका लागि नौलो हुन सक्छ। धैर्य गर्नुहोस्। घोडचडीहरूका साथमा राजा वा राजकुमारको सवारी हुँदा अन्य सवारी साधनहरू सडकका किनारामा उभ्याउनु पर्दछ र पुलिसले अनुमति दिएपछि मात्र अघि बढाउनु पर्ने हुन्छ। कतारमा जुवा तास खेल्न पूर्णत: निषेध गरिएको छ।
परम्परागत तथा प्रचलित वेषभूषा लगाउनु पर्दछ। धेरैजसो खाडी (अरब) देशहरूमा पुरूषहरूलाई सार्वजनिक स्थानमा हाफ पेन्ट र बाहुला नभएको भेस्ट लगाउने अनुमति छैन। सुपरमार्केटमा किनमेल गर्न जाँदा यो कुरामा अझ बढी ध्यान पुर्याबउनु पर्ने हुन्छ। विदेशीहरूले कतारको राष्ट्रिय पहिरन लगाउनुलाई अनादरको सूचक मानिन्छ। महिलाहरूले पनि स्थानीय पहिरनमा ध्यान पुर्याहउनु पर्ने हुँदा सार्वजनिक ठाउँमा छोटा लुगा र चुस्त खालका जिन कपडा लगाउनु हुँदैन। सामुद्रिक किनार तथा होटलका स्नान पोखरी परिसरमा यति धेरै सावधानी अपनाउनु नपर्ने भए पनि विवेक सङ्गत व्यवहार चाहिँ प्रदर्शन गर्नु पर्दछ।सार्वजनिक स्थानमा महिला तथा पुरुषका बीच (ठिटाठिटीसमेत) को प्रेमालाप प्रदर्शन स्वीकार्य हुँदैन।
फोटो खिच्ने विषयमा कतारका जनता निकै संवेदनशील हुन्छन्। फोटो खिच्नै पर्ने भएमा अनुमति लिनु पर्दछ। विशेष अनुमति नलिई कुनै पनि सरकारी भवन, औद्योगिक क्षेत्र र सैनिक क्याम्पको फोटो लिनु हुँदैन। हवाइ अड्डा फोटो खिच्नका लागि प्रतिबन्धित छ।
रमदान पर्व पर्ने महिनाभरि सूर्योदयदेखि सूर्यास्तसम्मको उपवास समयभरि सार्वजनिक स्थानमा खान, पिउन र चुरोट बिँडी सेवन गर्न पाइँदैन। यस अवसरमा मुस्लिम परम्परामा आघात पर्ने खालको कुनै पनि गतिविधि गर्नु नहुने कुराको हेक्का राख्नै पर्छ।
आफ्नो परिचय पत्र सधैं साथमा राख्नुपर्छ।

सामान्य जानकारी
कुनै अरबी नागरिकले आफ्ना घरमा निमन्त्रण गरे भने सधैं स्वीकार गर्नुहोस्। स्थानीय जनतासँग परिचित हुने जुनसुकै अवसरको पनि सामान्यतया सदुपयोग गरि हाल्नुहोस् । आफ्नो देश वा समाजमा प्रचलित परम्परालाई मानेर आफ्नै पारामा चल्ने खालको बानी सुधार्नुहोस्। अरबीहरूले तपाईं र तपाईंको विचारप्रति रुचि प्रदर्शन गर्न सक्छन्। तैपनि, राजनैतिक तथा धार्मिक विषयमा बढी चासो गर्नु राम्रो हुँदैन। पाश्चात्य समाजमा सहज स्वीकार्य दृष्टिकोणहरू पनि अरबी देशहरूमा मान्य नहुन सक्छन्।
केही खान दिइयो भने तत्काल ग्रहण गरिहाल्नु पर्दछ तर खाने कुरा खाँदा दाहिने हातले मात्र खानु पर्दछ किनभने शारीरिक सरसफाइमा देब्रे हातको प्रयोग गरिने हुँदा अशुद्ध मानिन्छ। त्यसैगरी तपाईंले जुत्ताको सोल वा खुट्टाको पाइताला कसैलाई देखाउनु हुँदैन । यसो गर्नुको अर्थ अगाडि बसेको व्यक्ति फोहोरी छ भन्ने झल्काउनु हो। यसो गर्नु साँच्चिकै अपमान जनक कार्य हो। त्यसकारण खुट्टालाई जमिनमा टेकाइ राख्नु पर्छ, उपरखुट्टी लगाएर बस्नु हुँदैन।
पूर्व जानकारी विना कुनै पनि अरबी जनताका घरमा जानु हुँदैन। घरमा महिलाहरू मात्र भएका बेला त्यहाँ पुग्नु राम्रो मानिँदैन। अरबेलीहरूका घरमा रहेको कुनै पनि चिजबिजको प्रशंसा गर्नु हुँदैन किनभने अतिथिले प्रशंसा गरेको वस्तु अतिथिलाई नै उपहार दिने उनीहरूको प्रचलन रहेको छ। यद्यपि यो परम्पराको सबैले पालना गरेको देखिँदैन तैपनि यसो गर्दा असजिलो स्थिति उत्पन्न हुन सक्छ। अझ भन्नुपर्दा आफूले प्राप्त गरेको उपहारभन्दा पनि मूल्यवान् उपहार दिनुपर्ने प्रचलन समेत रहेको हुँदा अरबेली मित्रको कुनै सामानको प्रशंसा गर्नुभन्दा अघि दुई पटक सोच्नु बुद्धिमानी होला।

गर्नु हुने र गर्नु नहुने (सामाजिक दृष्टिले)
अघिकांश ओमानी जनता इस्लाम धर्मका नीति नियमहरूको पालना गर्ने कुरामा प्रतिबद्ध हुनाका साथै परम्परावादी/रूढीवादी हुन्छन्। ओमानीहरू अतिथि सत्कारमा निपुण तथा मैत्रीपूर्ण भए पनि कतिपय विषयमा संवेदेनशील हुन्छन्। ओमानका जुनसुकै ठाउँमा पनि फोटो खिच्नुलाई राम्रो मानिँदैन भने महिलाहरूको फोटो खिच्ने कार्यलाई त अक्षम्य अपराध नै ठानिन्छ। ग्रामीण क्षेत्रमा जाँदा परम्परागत र साधा किसिमको पहिरन लगाउने सल्लाह दिइन्छ। पुलिसको कोप भाजन हुनबाट जोगिनका लागि सार्वजनिक स्थलमा मादक पदार्थ सेवन गर्नु हुँदैन। रमदानका अवसरमा सार्वजनिक स्थानमा खाने, पिउने वा धुम्रपान सेवन गर्ने काम गर्नै हुन्न।
ओमानमा महिलाहरूले गाडी चलाउन र अङ्गरक्षक विनै यताउति घुम्न पाउँछन् तर महिलाहरू (खास गरी एक्लै हुँदा) ले सहरका सस्ता होटलहरूमा असुरक्षा महसुस गर्न सक्छन्। त्यस्ता महिलाहरूले राति कसैले ढक्ढक्याउँदा ढोका खोल्नु हुँदैन । त्यसैगरी सडकतिर हेर्नु र कसैले बोलाउँदा वा सुसेल्दा वास्ता गर्नु हुँदैन। हरेक रेस्टुरेन्टहरूमा पारिवारिक कोठाहरू हुन्छन् त्यसैले महिला पर्यटकहरूलाई कोठाभित्रै खाना खाने सल्लाह दिइन्छ। परम्परित वेषभूषा लगाउने, पाखुरा तथा पिँडुला छोप्ने गरी लुगा लागाउने र सामुद्रिक किनारमा समेत छोटा लुगा नलगाउने जस्ता उपाय गरेर आफूप्रति मानिसहरूको ध्यान आकर्षण नहुने अवस्थाको सृजना गर्न सकिन्छ। विदेशी महिलाहरूले बुर्का लगाउनै पर्छ भन्ने छैन तर ग्रामीण इलाकामा बुर्का लगाएका विदेशी महिलाहरूलाई बढी सम्मान गरिन्छ। ओमानमा कुनै विदेशी महिला एक्लै घुमेको दृश्य दुर्लभ जस्तै हुने भएकाले परम्परागत पहिरनमा बाहिर निस्कनु बुद्धिमत्तापूर्ण हुन्छ।
ओमानी समाज अत्यन्तै सुव्यवस्थित भएको हुँदा उपयुक्त पहिरन लगाउने र पुलिसले जासुसी गरेको शङ्का गर्ने कुनै गतिविधि नगरुन्जेल तपाईं सुरक्षित हुनुहुन्छ। ओमानमा गैर-मुस्लिमहरूलाई मस्जिद भित्र पस्न दिइँदैन।
ओमानको सरकारी भाषा अरबी हो तर ठुला सहर र व्यापारिक केन्द्रहरूमा अङ्ग्रेजी पनि पर्याप्त प्रयोग गरिन्छ। मार्ग सङ्केतक तथा होटलका मेनुहरू अरबी तथा अङ्ग्रेजी दुवै भाषामा उपलब्ध हुन्छन्। विदेशी कामदारहरूले उर्दू, हिन्दी र फारसीमा कुराकानी गर्छन्। शिक्षाको माध्यम, सरकारी कामकाज तथा सञ्चार माध्यमहरूमा अरबी भाषाको प्रयोग गरिने भए पनि बोलिचालीमा अरबीका थुप्रै स्थानीय भेदहरूको प्रयोग हुन्छ। ओमानका सलालाह तथा अन्य दक्षिणी सहरहरूमा दोफारी भाषिका बोलिन्छ भने मुसान्देन प्राय:द्वीपका कतिपय बासिन्दाहरूले कुमजारी (हिन्दी, फारसी र पोर्तुगाली वर्णसङ्कर ) भाषा बोल्दछन्।